Bang Puk Imbau Wargonyo Jangan Mudik Dulu Demi Jago Keluargo
Peristiwajambi.com, JAMBI – Gubernur Jambi Dr.Drs.H.Fachrori Umar, M.Hum Himbau wargonyo untuk idak mudik dulu di Lebaran Tahun iko selamo masih ado wabah viros Corona ni untuk jago keluargo di dusun supayo biso memutus mati rantai penyebaran Covid-19 ini.
“Kepado sanak saudaro, kanti-kanti, dulur-dulur yang ado di perantoan, dimano bae berado. Janganlah balek mudik dulu untuk sementaro ko, guno menjago keluargo kito di dusun dari Corona,” kato Fachrori dengan logat dan bahaso melayu Jambi, Rabu (22/4).
Himbauan Kepalo daerah “Bumi Sepucuk Jambi Sembilan Lurah ini dikeluarkan hinggo belom tau kapan habisnyo. Hal iko demi melindungi keluargo besamo.
“Tahan dululah mudik, dengan caro ko kito biso mutusi rante virus Corona, dan untuk keluargo yang di Jambi jangan pulak nak pegi-pegi ke luar kota, tunda dulu, tunak be di Jambi,” kata Fachrori.
Kato Fachrori, Hal iko jugo karno Presiden Joko Widodo telah bilangi seluruh wargo jangan mudik. Memang, wargo yang dilarang mudik yang berasal dari daerah yang menerapkan Pembatasan Sosial Berskala Besar (PSBB) dan lagi daerah zona merah Corona lainnyo.
Makonyo, Gubernur kito jugo nyuruh wargo Jambi untuk jangan pegi-pegi ke daerah zona merah dan apo lagi daerah yang menerapkan PSBB. Jambi memang belum PSBB, namun tetap bae wargo disuruh tunak bae dulu di umah kini tu, untuk menangkal Corona.
“Ayo, samo-samo sadar berjuang besamo, bersatu melawan Covid-19. Setop debat, saatnyo bebuat nyato. Semoga cobaan ko cepat berlalu, Aamiin Ya Rabbal Alamin,” tutupnyo.
Kini, Pemerintah Provinsi (Pemprov) Jambi sedang berupayo mengurangi penyeraan virus Corona. Salah satunyo, dengan menjago jalan masuk nak ke Jambi di batas daerah dan wilayah provinsi tetanggo.
Gubernur Jambi, yang akrab disapo Bang Puk iko jugo udah nyuruh segalo bupati/wali kota untuk besamo menangani dan besatu membasmi Corona di setiap daerah wilayah se-Provinsi Jambi. (Rma/*)
